Nei Restriktiounen: 3G op der Schaff, 2G bei Fräizäitaktivitéiten an Hobbyen

D’Regierung huet gëschter hir ugeduechten nei Covid-Mesure virgestallt, dëst fir ënneranerem e weidere Lockdown ze verhënneren.

D’FGFC deelt am deem Kontext Folgendes mat:

Aktuell lafe geriichtlech Prozesser déi kläre sollen, op déi nach aktuell Mesuren, déi néideg juristesch Grondlagen erfëllen. D’Kompetenz heifir läit eenzeg an eleng bei de Geriichter, déi elo heiriwwer entscheede mussen.

D’Regierung géif mat deenen ugeduechten, neie Mesuren opmannst déi vun de Sozialpartner gefuerdert Verantwortung iwwerhuelen an eenheetlech Mesuren, betreffend d’Aarbecht a Fräizäit, festleeën, amplaz se, wéi bis elo, un déi eenzel Chef d’administration respektiv de Patron ofzeginn.

D’FGFC vertrëtt de klore Standpunkt, dass keen duerch déi vun der Regierung ugeduechten nei Mesuren seng Aarbechtsplaz verléiere dierf. Et geet dofir och en Appell un eis kommunal Patrone vu Sanktiounen ofzegesinn an dofir ze suergen, dass all aner Méiglechkeete genotzt ginn (Télétravail, Congé, Dispensen…) fir gemeinsam Léisunge mam gesamte Personal ze fannen.

Op der Pressekonferenz sinn nach keng praktesch Modalitéite matgedeelt ginn. Bei der Ëmsetzung vun dësen neie Mesurë geet et awer, wéi ëmmer, ëm den Detail, an et ass ofzewaarden, bis dee bekannt ass. D’FGFC steet op jiddefalls senge Personaldelegéierte mat Rot an Dot zur Säit.

D’FGFC rifft jiddereen op, Eegeverantwortung z’iwwerhuelen an de Maximum dofir ze maachen, sech selwer an seng Matbierger ze schützen - dëst gëllt fir ongeimpft a geimpft.

Géigesäitege Respekt an Eegeverantwortung sinn am Moment zwee wichteg Schlëssele fir duerch dës zäitlech ondefinéiert Pandemie ze kommen.