Aktuell Covid-Mesuren - Schluss matt der Diskriminéierung vum Enseignement musical !

De Frust bei den Enseignanten an de Schüler vum Enseignement musical ass aktuell grouss. Bekanntlech gëllt fir de Muséksunterrecht am Contraire zum Enseignement public d’2G Covid-Regel, genau esou wéi fir all aktuell Fräizäitaktivitéit. Bekanntlech ass dëst d’Argument op Regierungssäit: Well den Enseignement musical net verpflichtend ass, gëllt en als kulturell Aktivitéit, scheinbar ergo net esou wichteg wéi d’Schoul.

En Enseignement musical « à distance » huet seng kloer Limiten. Hei geet vill Qualitéit am Muséksunterrecht verluer. All dëst muss op de strikte Minimum vun deem, wat wierklech néideg ass, limitéiert ginn.

Kënnt nach dobäi, datt innerhalb vum Enseignement musical eng net ze vernooléissend Unzuel vu Schüler prosperéiert, déi sech op Etudes supérieures, spréch op eng berufflech Carrière preparéieren. Déi aktuell Mesurë riskéieren also, datt ganz Liewensdreem an e Koup faalen.

Während de leschten zwee Joer hunn déi Responsabel an de Conservatoiren an an de Muséksschoulen ganz kloer bewisen, datt si strikt Covid Mesurë kënnen a wëllen applizéieren. Zemools am Kontext vun den aktuelle Lackerunge vun de Covid-Mesurë gehéiert hei dringend eng aner Regel, par Analogie zum Enseignement public, en Place gesat. Mir fuerderen: Schluss matt der Diskriminatioun vum Enseignement musical par Rapport zum Enseignement public.

Den Educatiounsminister Claude Meisch ass vun eiser Säit, vun de Kolleeginnen a Kolleegen aus dem Enseignement musical, mat konkrete Fuerderunge konfrontéiert ginn.