Zäitspuerkonten och bei Gemengen a Syndikater obligatoresch!

Endlech erwächt och Lëtzebuerg a Punkto Flexibilitéit vun der Aarbechtszäit, aus dem gefillte Mëttelalter. Gëscht koum et innerhalb vun der Chamber zu engem unanime Vote betreffend d’Zäitspuerkonten an der Fonction Publique. Zënter laangem fuerdere net nëmme jonk Kolleginnen a Kollegen nei Aarbechtszäit-Modeller déi hire berufflechen, perséinlech an effektive Besoiën ugepasst sinn. “Métro-boulot-dodo”, een Dag wéi deen Aneren, reflektéiert scho laang net méi den Alldag vun de Kolleginnen a Kollegen um Terrain.

De politesche Parteien hei en décke Merci, datt si dat kollektiv och esou gesinn.

No dësem Vote huet den Dan Kersch, an senger Qualitéit als Inneminister, sech formell engagéiert, d’Zäitspuerkonten och obligatoresch bei de Gemengen a Gemengesyndikater anzeféieren, dëst zum selwechten Datum wéi bei de Kolleginnen a Kollegen beim Staat (viraussiichtlech 1. Oktober 2018). Dëst ass fir d’éischt, datt esou eng Mesure ouni Retard op de Staat ëmgesat gëtt. En décke Merci un den Dan Kersch an awer och un d’Vertrieder vum SYVICOL, déi heimader averstane sinn.

Bleift nach kuerz ze informéieren, datt am Fall vum Wiessel vum Staat bei d’Gemeng, bzw. vu Gemeng zu Gemeng, d’Zäitspuerkonten per Congé op Null musse gesat ginn. Ausbezuelen gëtt nëmme méiglech am Fall vun enger Démissioun. Fir eis nëmme logesch well et verschidden “entités juridiques” sinn.

Wat fir eis gëllt, gëllt och fir d‘Kolleginnen an d’Kollegen aus dem Privatsecteur. Hei hoffe mer, datt dat geplangte Gesetz esou schnell wéi méiglech gestëmmt gëtt.

Mir wäerte weider iwwer d‘Detailer vun dësem Meilesteen a Punkto Organisatioun vun der Aarbechtszäit informéieren.